۔۔۔ مَا لَهُمْ فِي الْأَرْضِ شَبِيهُونَ
حضرت ابوالفضل العباس
انسان جب کسی کو پہچنوانا چاہتا ہے تو اس کی واضح ترین صفت کا انتخاب کرتا ہے ،لیکن
اگر کسی ذات میں تمام صفات اعلی ترین
حد امکان پر موجود ہوں تو عقل حیران رہ
جاتی ہے اور انتخاب نہیں ہوپاتا۔
حضرت علمدار کربلا (ع) کی شخصیت کچھ ایسی ہی ہے جہاں ہماری ظاہربین نگاہیں نہ
انکے فضائل کو احاطۂ دید میں لاسکتی ہیں اور نہ ہی طائر فکر ان کے کمالات کے حدود
تک رسائی حاصل کرسکتا ہے۔
آپ(ع) کے فضائل کا ادراک اور ان کی تفسیر اگر ممکن کی ہے تو ائمۂ طاہرین
علیہم السلام سے ہی ہے ،چنانچہ صادق آل محمد(ع) علمدار کربلا(ع) کے بارے میں فرماتے ہیں: كان عمّنا العبّاس نافذ
البصيرة، صلب الايمان، جاهد مع أبى عبد اللَّه، و ابلى بلاء حسنا، و مضى شهيدا.
میرے چچا عباس گہری بصیرت اور مضبوط تکیہ گاہ ایمانی کے حامل تھے ،آپنے اپنے
بھائی امام حسین(ع) کے ساتھ جہاد کیا اور اس امتحان گاہ میں سرفراز و سربلند ہوئے
اور درجہ شہادت پر فائز ہوئے۔
در سوگ امير آزادى ( ترجمه
مثير الأحزان )، ص 254؛ ابصار العين، ص 30؛ مقتل الحسين، ابومخنف، ج1،
ص176۔
امام زین العابدین (ع) فرماتے ہیں ۔۔۔۔۔ إِنَّ لِلْعَبَّاسِ عِنْدَ اللَّهِ تَبَارَكَ وَ تَعَالَى مَنْزِلَةً
يَغْبِطُهُ بِهَا جَمِيعُ الشُّهَدَاءِ يَوْمَ الْقِيَامَةِ.
خدا کے نزدیک روز قیامت جناب عباس علیہ السلام کی عظمت اسقدر عظیم ہوگی جس پر
تمام شہداء رشک کریں گے۔
الأمالي( للصدوق)، ص463،المجلس السبعون؛ بحار الأنوار (ط - بيروت)، ج22،ص274۔
امام سجاد علیہ السلام نے واضح لفظوں میں تمام شہداء کہا ہے جسمیں سید الشہداء
جناب حمزہ اور جناب جعفر طیار بھی شامل جیسی عظیم شخصیتیں بھی شامل ہیں جو آپ کی
پروقار اور بلند و بالا شخصیت کے لئے ایک دلیل ہے۔ اس کے علاوہ امام سجاد(ع) نے
اپنے عمل کے ذریعہ بھی علمدار کربلا کا
تعارف کرایا ہے۔ جب شہداء کی تدفین کے وقت امام حسین (ع) اور جناب عباس (ع) کی
تدفین کا مسئلہ پیش آیا، کسی کو شریک نہ کیا اور فرمایا: ان معی من یعنینی میرے ساتھ مدد کرنے والے افراد موجود ہیں۔
قہرمان علقمہ، ص65 بحوالہ العباس۔
اس اختصارنامہ میں آپ کے فضائل و
کمالات پر روشنی ڈالنے کا حق ادا نہیں کیا
جاسکتا، بس چند مشہور خصوصیات کو بطور نمونہ پیش کرنا مقصود ہے:
شجاعت:
تہور اور جبن کے درمیانی صفت کو شجاعت کہتے ہیں، شجاعت اعتدال کی اس منزل کا
نام ہے جہاں نہ افراط کا کچھ گذر ہے اور نہ ہی تفریط کی کوئی خبر، جہاں کہیں بھی
اگر کسی والا مقام شخصیت کا تذکرہ ہوگا اسکی صفات میں ذکر شجاعت بھی برملا ہوگا اس
لئے کہ انسان کی شخصیت تبھی سنور پاتی ہے جب اس میں حق و ناحق کی شناخت کے ساتھ
ساتھ حق کو اپنانے اور باطل و ناحق کو دور کرنے کی قوت بھی موجود ہو، اور یہ انجام
و گریز کی کیفیت شجاعت کے بغیر نہیں ہوسکتی۔
حضرت علمدار کربلا کی ذات گرامی شجاعت کا ایک بہترین اور منفرد نمونہ ہے۔ جیسا
کہ صاحب منتہی الآمال آپ (ع) کے نام مبارک ’’عباس کی وجہ تسمیہ میں فرماتے ہیں:
عباس صیغہ مبالغہ ہے، آپ(ع) کو آپ کی منفرد شجاعت کی بنیاد پر عباس کہا گیا ہے۔
آپ نے دوسری فیوض کےساتھ شجاعت بھی اپنے والد گرامی حضرت علی مرتضی سے وراثت
میں پائی تھی ، دوسری طرف مادر گرامی بھی اس خاندان سے تعلق رکھتی تھیں جنکے
شہسوار دنیائے عرب میں اپنی شجاعت کا کلمہ پڑھواچکے تھے ۔ اس کے علاوہ آپ کی
شجاعت کی اچھی سے اچھی تربیت دینے والی شخصیت بھی حضرت امیر المومنین(ع) کی ذات
تھی۔
جناب عباس کی شجاعت کا ایک نمونہ جنگ
صفین ہے، جہاں پر آپ نے میدان جنگ میں شجاعت کے جوہر دکھاکر دشمن کیا
امیرالمومنین کے اصحاب کو بھی متحیر کردیا تھا، جب معاویہ کے لشکر نے فرات پر قبضہ
جماکر لشکر حیدر کرار کی کمر ہمت توڑنے کی بے سود کوشش کرڈالی تو امام حسین (ع) کی
سربراہی میں نہرفرات کو آزاد کرالیا گیا، جناب عباس بھی اس حملہ میں امام حسین(ع)
کے ساتھ موجود تھے۔ جنگ صفین میں ہی ایک مرتبہ آپ (ع) چہرے پر نقاب ڈال کر میدان
جنگ میں آگئے اور مبارز طلب کرلیا، اگر چہ دشمن آپ(ع) کو پہچان نہ سکا لیکن آپ
کی شجاعت اور ہیبت سے لرزہ بر اندام تھا، معاویہ نے ابو الشعشاء کو مقابلہ میں
جانے کا حکم دیا۔ ابوالشعشاء کہنے لگا: شام کے لوگ مجھے دس ہزار سواروں کے برابر
سمجھتے ہیں اور آپ مجھے ایک بچے کے مقابل بھیج رہے ہیں میرے سات فرزند ہیں کسی
ایک کو بھیج کر اس کا کام تمام کردونگا اور اس نے ایک کے بعد ایک اپنے بیٹوں کو بھیجنا
شروع کردیا اور نقاب پوش نے سب کو ٹھکانے لگانا، یہ دیکھ کر ابو الشعشاء کی نظروں
میں دنیا تاریک ہوگئی تو خود ہی جناب عباس کے مدمقابل آکھڑاہوالیکن آپ(ع) نے اس
کو بھی اس کے بیٹوں کے پاس پہونچا دیا ۔ اب کسی میں جرات نہ تھی جو میدان میں
آتا، اصحاب امیرالمومنین بھی حیرت میں تھے کہ آخر یہ نقابدار ہے کون؟تبھی حضرت
علی (ع) نے جناب عباس کو اپنے پاس بلاکر چہرے سے نقاب ہٹادی، لوگوں نے دیکھا کہ وہ
نقابدار کوئی اور نہیں بلکہ حضرت عباس ہیں۔
چہرہ درخشان، حضرت ابوالفضل العباس، ج1، ص167۔
آپ کی شجاعت و ہیبت کا یہ عالم تھا کہ کربلا میں دشمن ہمیشہ مختلف حیلوں،
بہانوں کے ذریعہ آپ (ع) کو امام حسین (ع) کے لشکر سے جدا کرنے کی ناکام کوشش کرتا
رہا ، اس لئے کہ وہ جانتا تھا کہ جب تک عباس کے دم میں دم ہے لشکرمخالف کی پسپائی
کا تصور بھی بیکار ہے، اسی سلسلہ میں شمر بھی رشتہ داری کو وسیلہ بناکر اپنے ناپاک
عزائم کو امان نامہ کی شکل میں عملی جامہ پہنانے آگیا لیکن آپ نے دندان شکن جواب
دیتے ہوئے الٹے منھ واپس کردیا: تَبَّتْ يَدَاكَ يَا عَدُوَّ اللَّهِ أَ تَأْمُرُنَا أَنْ
نَتْرُكَ سَيِّدَنَا وَ أَخَانَا وَ نَدْخُلَ فِي طَاعَةِ اللُّعَنَاء۔ اے دشمن خدا تیرے ہاتھ ٹوٹ جائیں اور لعنت ہو تیرے لائے ہوئے امان نامہ پر،
تو مجھے حکم دیتا ہے کہ اپنے بھائی اور آقا حسین علیہ السلام کو ساتھ چھوڑدوں اور
لعینوں کی اطاعت کروں؟
مثير الأحزان، ص56؛ غم نامه كربلا / ترجمه اللهوف على قتلى
الطفوف، ص112،رد شديد امان نامه شمر۔
وفاداری:
میدان کربلا وفاداری کی زندہ مثال ہے جہاں پر امام حسین (ع) کے تمام اصحاب
ایمان کی دولت سے مالامال، خلوص دل سے ہمیشہ کے لئے حکم امام کے تابع تھے۔ اس طرح کہ
شب عاشورکا یہ عالم تھا کہ ایک طرف حضرت عباس اپنے خیمہ میں اقرباء کو جنگ کی
ترغیب دے رہے تھے تو دوسری جانب اصحاب حبیب ابن مظاہر کے پاس ہمہ تن گوش تشریف
فرماتھے۔ وفاداری کے یہ چراغ اس طرح روشن ہوئے کہ دشمن کی طرف سے ظلم و ستم کی
ہزارہا آندھیاں چلیں لیکن ان چراغوں کو بجھانہ سکیں ۔امام حسین (ع) نےبھی
اپنے اصحاب کے بارے میں فرمایا: فَإِنِّي لَا أَعْلَمُ أَصْحَاباً أَوْفَى وَ لَا
خَيْراً مِنْ أَصْحَابِي. میں اپنے اصحاب سے زیادہ وفاشعار کسی کے اصحاب کو نہیں جانتا ۔
الإرشاد في معرفة حجج الله على العباد،ج2، ص91؛ إعلام
الورى بأعلام الهدى (ط - القديمة)، ص238۔
لیکن لفظ وفا عباس سے اس طرح جڑ گیا
کہ ادھر وفا کا تذکرہ ہوا ادھر نظروں میں عباس آجائیں۔اس لئے کہ کربلا میں نہ صرف
آپ خود موجود تھے بلکہ اپنے تین بھائیوں کو بھی ساتھ لائے تھے اور ہمیشہ انہیں
جنگ کی ترغیب کرتے رہتے تھے: يَا بَنِي أُمِّي تَقَدَّمُوا حَتَّى أَرَاكُمْ قَدْ
نَصَحْتُمْ لِلَّهِ وَ لِرَسُولِه
اے میرے بھائیو! آگے بڑھو تاکہ میں
اللہ اور اس کے کے لئے تمہارے خلوص کو دیکھوں۔
الإرشاد في معرفة حجج الله
على العباد،ج2، ص109؛ إعلام الورى بأعلام الهدى (ط - القديمة)، ص248۔
آپ کی وفاداری کا یہ عالم تھا کہ جب آپ کا پرچم دربار یزید میں پہونچا، کسی
جگہ سے سالم نہیں بچا تھا۔ یزید نے سوال کیا یہ پرچم کس کے ہاتھ میں تھا؟ جواب
ملا: عباس بن علی کے ہاتھوں میں تویزید جیسا شقی بھی کہتا ہے: ھکذایکون وفاء الاخ لاخیہ۔ بھائی سے بھائی کی وفاداری اس طرح ہوتی ہے۔
سوگنامہ آل محمد، اشتہاردی، ص300۔
جب آپ کو پانی لانے کی اجازت ملی اور آپ نہر فرات تک پہونچ گئے اس وقت تو
وفاداری کی انتہا ہوگئی، نہایت تشنگی کے باوجود پانی سے منہ پھیر لیا، زباں پر
جملہ تھا: و الله لا اذوق الماء و سیدی الحسین عطشانا . خدا کی قسم جبکہ میرا آقا حسین
پیاسا ہے میں پانی نہیں پی سکتا۔
سوگنامہ آل محمد(ص)، اشتہاردی، ص304؛
ایمان و معرفت:
حضرت عباس مظہر ایمان کامل اور یقین محکم ہیں، آپ کی زندگی دریائے معرفت کو
سمیٹے ہوئے نظر آتی ہے، محدث نوری کشکول
شہید سے نقل کرتے ہیں کہ ایک روز علی مرتضی جناب عباس اور حضرت زینب (ع) کو پہلو
میں بیٹھائے ہوئے تھے حضرت عباس نے بولنا شروع کردیا تھا علی (ع)نے عباس(ع) سے
فرمایا: کہو ’’واحد‘‘ عباس (ع)نے واحد کہا پھر آپ (ع)نے عباس(ع) سے کہا: کہو
’’اثنین‘‘ لیکن عباس (ع) نے اس کلمہ کو نہ دہرایا اور کہا مجھے شرم آتی ہے کہ جس
زباں سے خدا کو واحد کہاں ہے اسی زباں سے دو کہوں۔فرسان الہیجاء، ج1، ص191۔
آپ(ع) کے ایمان محکم کی تصدیق میں صادق آل محمد کا یہ جملہ کافی ہے: کان
عمنا العباس نافذۃ البصیرۃ، صلب الایمان۔ ہمارے عم محترم عباس پختہ بصیرت اور
مستحکم ایمان کے حامل تھے۔ یہ آپ(ع) کی معرفت اور محکم ایمان کا ہی نتیجہ تھا کہ
آپ ہمیشہ کے لئے سخت سے سخت دوران زندگی میں امام کی حمایت میں مصروف رہے اور ان
کی اطاعت میں سر خم کئے رہے، آپ پر کسی کی بھی شیطنت کارگر نہ ہوسکی۔ ظاہر ہے جہاں
پر ایمان مستحکم ہوتاہے، معرفت منزل عروج پرہوتی ہے وہاں پر اس طرح کی اطاعت اور
اعمال کی تجلی دکھائی پڑتی ہے۔
آپ (ع)کے تاریخی رجز کو آپ(ع) کے مستحکم ایمان کی دلیل کے طور پر دیکھا جا
سکتا ہے۔ جب آپکا داہنا بازو قلم ہوا تو آپ نے فرمایا:
واللہ ان قطعتم
یمینی
انی احامی ابداعن
دینی
و عن امام الصادق الیقین
نجل النبی المصطفی
الامین
خدا کی قسم اگر تم نے میرے داہنے ہاتھ کا قطع کردیا میں پھر بھی اپنے دین اور یادگار پیغمبر اور اپنے رہبر حق کی حمایت
کرتا رہوں گا۔
اور جب بایاں بازو بھی قلم ہوگیا تو اس طرح گویا ہوئے:
یانفس لاتخشی من الکفار
وابشری برحمۃ الجبار
مع النبی السید المختار
قد قطعوا ببغیھم یساری
فاصلھم یارب حرالنار
اے نفس کافروں سے خوف نہ کھا، تجھے خدائے جبار کی بشارت ہو نبی اکرم کے ساتھ،
انہوں نے تیغ ظلم سے میرا بایاں بازو قلم کردیا، پروردگار انہیں دوزخ کی آگ کامزہ
چکھائے۔
بحار الأنوار( ط- بيروت)، ج45، ص40
عزت نفس:
حضرت ابوالفضل (ع)نے میدان کربلا میں عزت نفس کے ذریعہ جاہ و منصب کو ٹھکرایا
اور آخرت کو دار فانی پر ترجیح دی، نااہلوں کی اطاعت کو ٹھکراکر اللہ اور اس کے
ولی کی اطاعت کو اپنا شعار بنایا ،امام کی حفاظت میں اپنی جان کا نذرانہ پیش کرکے
عزت نفس کی بہترین مثال پیش کیا
اگر آپ کو عزت نفس کا خیال نہ ہوتا تو آپ کربلا سے پہلے بھی اپنا راستہ بدل
سکتے تھے، شب عاشور امام حسین(ع) کے بیعت اٹھا لینے پر جاسکتے تھے، شمر کا امان
نامہ لانا یا اموی لشکر کہ جو ہمیشہ اپنے مخالف لشکر کے سرداروں کو لالچ کے ذریعہ
جداکرتا رہا ہے یہاں بھی کارگر ثابت ہوجاتا اس طرح ممکن ہے آسایش فراہم ہوجاتی
لیکن عزت نفس پائمال ہوجاتی۔ اور یہ چیزیں اس شخص سے محال ہیں جو ہر لحاظ سے پاک و
پاکیزہ اور پورے عالم کے لئے نمونہ عمل ہو۔
صبروضبط:
صبر ایمان کے ارکان میں سے ہے۔ امام صادق علیہ السلام فرماتے ہیں: الصبرراس الایمان، دوسری جگہ فرماتے ہیں الصبر من الایمان بمنزلۃ الراس من الجسد۔۔۔
الكافي (ط - الإسلامية)، ج2،
ص87،باب الصبر .....
ایمان کے ساتھ صبر کو وہی مقام حاصل ہے جو سر کو بدن کے ساتھ، اگر سر نہیں
ہوتا ہے تو انسان کا جسد بھی بیکار ہوجاتا ہے، اسی طرح اگر ایمان کے ساتھ صبر نہ
ہوتو ایمان ایمان نہیں رہ جاتا۔ جناب عباس کی خصوصیات میں سے ایک صبروضبط ہے۔ آپ
کی شہرت خاص شجاعت اور غیض سے ہے اور کسی طاقتور سے شخص سے بعید ہوتا ہے کہ وہ ظلم
دیکھتا رہے اور برداشت کرتا رہے، ظلم ہوتا رہے اور شجاعت بت بنی بیٹھی رہے، طاقتور
شخص تو ایسے موقع کی تلاش میں ہوتا ہے کہ اسے کب شجاعت کے جوہر دکھانے کو ملے، کب
زور بازو کے اظہار کا وقت آئے۔ لیکن شاید یہ استنباط صحیح نہ ہو، اس لئے کہ ہم
طاقت اور شجاعت دونوں کو ایک سمجھ رہے ہیں، شجاعت کے لئے اگرچہ طاقت ضروری ہو لیکن
صاحب قدرت کے پاس ضروری نہیں کہ شجاعت بھی ہو، لیکن شجاعت ایسی صفت ہے جہاں شجاعت
ہوگی وہاں پر صبر بھی ہوگا اور جہاں صبر ملے گا شجاعت بھی ہوگی۔ اس لئے کہ صبر
ہاتھ ہر ہاتھ دھرے بیٹھنے کا نام نہیں ہے بلکہ استقامت اور حق پر ثابت قدم رہنے کا
نام ہے ، کربلا میں ظلم کی آندھیاں چلتی رہیں لیکن چہرہ ٔصبر عباس کو غبارآلود
بھی نہ بنا سکیں، آپ نے ایسے جانگداز ماحول میں بھی اپنے آقا سے کچھ نہ کہا،
باوفا اصحاب، اعزاو اقربا کو خون میں غلطاں دیکھتے رہے، العطش العطش کی صدائیں
کانوں سے ٹکراتی رہیں، جگر ٹکڑے ٹکڑے ہورہاتھا، لیکن سر امام کی اطاعت میں خم تھا،
یہاں پر صرف اور صرف امام برحق اور خدا کی رضا مدنظر تھی۔
