#حضرت_امام_حسین_علیہ_السلام:
#غیبت
▪️ لَا تَقُولَنَّ فِي أَخِيكَ الْمُؤْمِنِ إِذَا تَوَارَى عَنْكَ إِلَّا مِثْلَ مَا تُحِبُّ أَنْ يَقُولَ فِيكَ إِذَا تَوَارَيْتَ عَنْهُ۔
▪️ اپنے برادرِ مومن کے بارے میں اس کی غیر موجودگی میں کچھ نہ کہو سوائے ایسی بات کے جسے تم پسند کرتے ہو کہ وہ تمہاری غیر موجودگی میں کہے۔
📚 كنز الفوائد، ج۲، ص۳۲، فصل من عيون الحكم و نكت من جواهر الكلام; بحار الأنوار (ط - بيروت)، ج۷۲، ص۲۶۲، ح۶۸، باب الغيبة
✍🏼 دوستی اور رفاقت یہ ہے کہ دوست کے لئے انسان کا ظاہر و باطن ایک ہو، اور سامنے اور پیٹھ پیچھے کے الگ الگ برتاؤ سے پرہیز کیا جائے۔
جو لوگ مومن بھائی کی غیر موجودگی میں اس کی عیب جوئی اور تنقید کرتے ہیں، لیکن اس کے سامنے تملّق اور چاپلوسی کی زبان سے مخاطب ہوتے ہیں، وہ نفاق اور دو روئی جیسی صفت کا شکار ہیں، جس کا ایمان سے کوئی تعلق نہیں ہے۔
اگر ہم یہ پسند کرتے ہیں کہ ہماری غیر موجودگی میں لوگ ہمیں اچھائی سے یاد کریں، اور اچھے الفاظ سے ہمارے بارے میں گفتگو کریں اور ہماری اچھائیوں کا ذکر کریں، تو ہم بھی ان کی غیر موجودگی میں ایسا ہی کردار پیش کریں اور ان کی خوبیوں اور اچھائیوں کے سوا کوئی بات زبان پر نہ لائیں۔
برادرِ مومن اور دوست کی غیر موجودگی میں اس کے سلسلہ میں بدگوئی کا دوستی اور محبت سے کوئی واسطہ نہیں ہے۔
برادرِ ایمانی کے حقوق کا احترام اور خیال سخت ترین اخلاقی اور دینی فرائض میں سے ہے۔
اگر ہم چاہتے ہیں کہ لوگ ہمیں ادب و احترام کے ساتھ یاد کریں تو ہمیں بھی انکے ادب و احترام کا خیال رکھنا چاہئے؛ اگر ہمیں یہ گوارا نہیں کہ کوئی ہم کو برے القاب سے یاد کرے تو ہم بھی ان کے سلسلہ میں بیہودہ اور توہین آمیز الفاظ کا استعمال نہ کریں؛ اگر ہمیں اپنی غیبت بری لگتی ہے اور اس سے رنجیدہ ہوتے ہیں، تو ہم بھی کسی کی غیبت نہ کریں؛ اگر ہم دوسروں کے ذریعہ اپنے راز کے فاش ہونے پر ناراض ہوتے ہیں تو ہم بھی دوسروں کے راز کو فاش کر کے انکی رنجیدگی کا سبب نہ بنیں۔
